Праект «Чытаем па-беларуску з velcom» упершыню прыедзе ў Магілёў
У Магілёў 2 сакавіка ўпершыню прыедзе сацыяльна-адукацыйны праект «Чытаем па-беларуску з velcom». Фінальны вялікі адкрыты ўрок адбудзецца ў музеі гісторыі Магілёва — гарадской ратушы і збярэ болей 100 школьнікаў горада.
Настаўнікамі беларускай мовы стануць брамнік ФК «Днепр» Руслан Капанцоў, прадстаўнік прэс-службы клуба Андрэй Ільеня, а таксама пісьменніцы Раіса Баравікова, Наталля Бучынская і тэлевядучы Юры Жыгамонт.
Мэта гэтага праекта — развіць цікавасць школьнікаў 2-3 класаў да беларускай мовы і чытання беларускай літаратуры. З 2015 года акцыя кампаніi velcom праходзіць пры падтрымцы Міністэрства адукацыі Рэспублікі Беларусь.
Акрамя ўроку ў магілеўскай ратушы, інтэрактыўныя заняткі пройдуць у гімназіях №№ 1,2 і 4. А таксама, у сярэдніх школах №№ 21, 37, 40, 43, 45.
«Мы з радасцю адгукнуліся на прапанову прыняць удзел у ініцыятыве „Чытаем па-беларуску з velcom“. Наш футбольны клуб не можа застацца ў баку ад такіх праектаў, мы хочам дапамагчы ў фармаванні беларускай нацыі. Вельмі важна, што падобныя ініцыятывы праходзяць у навучальных установах. Таму што менавіта на гэтым узроўні фарміруецца самасвядомасць чалавека. І чым больш адукаваным будзе новае пакаленне, тым больш мы зможам казаць пра адраджэнне нацыянальнай ідэнтычнасці», — адзначыў прадстаўнік прэс-службы футбольнага клуба «Днепр» Андрэй Ільеня.
Праект «Чытаем па-беларуску з velcom» пачаўся ў Мінску ў кастрычніку 2015 года і прайшоў ужо больш чым у 110 установах адукацыі. Вясной 2016 года гэтая ініцыятыва выйшла на рэспубліканскі ўзровень, бо арганізатары атрымлівалі шмат лістоў з просьбамі правесці падобныя ўрокі ў рэгіёнах краіны. Займальныя заняткі на беларускай мове ахапілі ўжо больш за 14 000 школьнікаў. Як чакаецца, у агульнай складанасці 150 школ і болей 20 000 вучняў па ўсей Беларусі возьмуць удзел у сацыяльнай адукацыйнай ініцыятыве».
