Галоўнае ў халоднае надвор’е — паклапаціцца аб кожным работніку
Студзень прынёс Магілёву гурбы снегу і траскучыя маразы. Камунальныя службы перайшлі на ўзмоцнены рэжым працы. Работнікі сферы ЖКГ, вадзіцелі аўтобусаў і тралейбусаў, будаўнікі, працаўнікі прадпрыемстваў працягваюць выконваць сваю справу, адаптуючыся пад асаблівыя зімовыя ўмовы. А за тым, як забяспечваецца выкананне нормаў і правілаў працы пры нізкіх тэмпературах, сочаць прафсаюзы.

У цэнтры ўвагі — людзі
Надвор’е працягвае выпрабоўваць беларусаў на трываласць. Здаецца, на некалькі дзён у краіну прыйшло пацяпленне — і вось ужо зноў у прагнозе на бягучы тыдзень паніжэнне тэмпературы да -25. Пры такім раскладзе дыскамфорт адчуваюць нават офісныя работнікі, што ж казаць пра тых, чыю працу нельга адкласці да вясны.
Штодзённа камфорт гараджан забяспечваюць камунальнікі — людзі, якія знаходзяцца на перадавой у барацьбе са снегам, галалёдам, ледзяшамі. Разам з тэхнічным інспектарам працы Магілёўскай абласной арганізацыі прафсаюза працаўнікоў жыллёва-камунальнай гаспадаркі Юліяй Дайнэка мы наведалі ўчасткі, дзе працуюць рабочыя па комплекснай уборцы і ўтрыманні домаўладанняў.

• Пры такой тэмпературы, як зараз (а на тэрмометры -12), працадаўцы павінны прадугледжваць перапынкі працягласцю ад 10 хвілін, каб людзі мелі магчымасць сагрэцца, — кажа Юлія Дайнэка.
• Але доўга знаходзіцца ў цяпле таксама нельга: цела разаграваецца, а вяртанне ў холад можа стаць стрэсам для арганізму. Для перапынкаў варта прадугледзець цёплае памяшканне і гарачую ежу, пітво, напрыклад, чай. Калі ж мароз не вельмі моцны, магчымасць адагрэцца павінна прадастаўляцца хаця б кожныя дзве гадзіны.
  Прафсаюзныя інспектары пільна сочаць за тым, каб права людзей на працу ў камфортных для здароўя ўмовах забяспечвалася належным чынам. Рэгулярна, у тым ліку і ў летні перыяд, яны праводзяць маніторынгі, гутараць з людзьмі, ладзяць інструктажы.
  
• Правяраем наяўнасць спецыяльнага адзення і абутку, цёплых рукавіц, каб людзі адчувалі сябе камфортна і мелі магчымасць без перашкод выконваць свае працоўныя абавязкі. Высвятляем, ці прытрымліваюцца патрабаванняў арганізацыі. Рэгулярна, сумесна са старшынямі прафсаюзных камітэтаў прадпрыемстваў выходзім на месца. Разумеем, што ў кожнай прафесіі свая спецыфіка і, нягледзячы на няпростыя ўмовы надвор’я, людзі ўсё роўна павінны выканаць сваю працу. Таму прафсаюзны камітэт імкнецца падтрымаць працаўнікоў, якія забяспечваюць жыццядзейнасць нашага грамадства, — удакладняе прафсаюзны інспектар.
  У тым выпадку, калі цягам маніторынгу інспектары заўважаюць, што нормы ў канкрэтнай арганізацыі не выконваюцца, у іх кампетэнцыі выдаць рэкамендацыі на імя наймальніка з пералікам парушэнняў і магчымых шляхоў іх ліквідавання. Аднак, як заўважае Юлія Дайнэка, большасць працадаўцаў сумленна ставяцца да сваіх абавязкаў і з разуменнем падыходзяць да забеспячэння ўмоў працы работнікаў у халодны перыяд году. Таму сёлета прафсаюзнаму інспектару не давялося скарыстацца крайняй мерай.
  
  Надвор’е патрабуе канцэнтрацыі
  За размоваю неўпрыкмет трапляем у «Тульскі дворык», дзе сустракаемся з рабочымі па комплекснай уборцы і ўтрыманні домаўладанняў Сяргеем Камковым і Генадзем Дайнэка. Нашы суразмоўцы працуюць у ЖЭУ № 1 КУП ЖРЭУ Ленінскага раёну. Іх участкі размяшчаюцца ў цэнтры, і некалькі хвілін таму мужчыны вярнуліся з невялікага перапынку ў абсталяваным для гэтага кабінеце аховы працы ў будынку па вуліцы Карла Маркса.
• Абстаноўка патрабуе. Разумеем, што трэба мабілізавацца, — дзеліцца думкамі Сяргей Жанавіч. — У гэтай сферы я працую чацвёрты год, на пенсіі хочацца камунікаваць з людзьмі, не замыкацца ў сваім свеце. Ды і карысць грамадству прыношу, гэта таксама грэе душу. З шасці раніцы я на працы, прачынаюся яшчэ раней. Калі Магілёў накрыла цыклонам, мы сканцэнтравалі свае намаганні, бо трэба было дапамагаць людзям: некаторыя праз снежныя насыпы не маглі раніцай выйсці з пад’ездаў.
  Заўважаем, што апрануты мужчына адпаведна надвор’ю: на руках цёплыя рукавіцы, спецадзенне таксама выглядае ўнушальна. І ўсё ж прафсаюзны інспектар цікавіцца, ці забяспечвае ЖЭУ сваіх работнікаў неабходным. І тут жа атрымлівае станоўчы адказ: скардзіцца, як заўважаюць мужчыны, не даводзіцца.
  Генадзь Дайнэка ачышчае вуліцы горада ад наступстваў капрызнага надвор’я ўжо восем год. Вопытны працаўнік заўважае: такія зімы за гэты час здараліся рэдка.
• Усяго адзін такі год памятаю, каб столькі снегу намяло і маразы не адпускалі. У такіх умовах, канешне, працаваць складана. Заняткаў хапае, без справы не сядзім: чысцім снег, пасыпаем сцежкі. А ўвогуле да сваёй прафесіі прызвычаіўся: хтосьці ж павінен наводзіць парадак, каб горад быў чыстым, а людзям было прыемна знаходзіцца ў сваіх дварах, — падсумоўвае Генадзь Аляксандравіч.
  
  Саграваюць цеплынёй
  Прафесійныя саюзы не абмяжоўваюцца кантролем за выкананнем правілаў. Для таго каб падтрымаць людзей, якія працуюць у няпростых умовах марознай зімы, арганізавалі акцыю «Сагрэй цяплом». За кароткай назваю — рэальныя справы.
  Як адзначае старшыня Магілёўскай абласной арганізацыі Беларускага прафсаюза работнікаў ЖКГ і сферы абслугоўвання Павел Жуйкоў, прапанаваны ў халодны дзень кубачак чаю не толькі сагравае ў прамым сэнсе, але і дорыць цеплыню душы.
  
• Работнікі нашай галіны выконваюць свае працоўныя абавязкі пры любым надвор’і. Ва ўмовах нізкіх тэмператур асабліва актуальна падтрымаць іх не толькі словам, але і справай, бо здароўе ў тым ліку — гэта і аснова эфектыўнай працы.
  
  Якую падтрымку ад прафсаюзаў ўключае акцыя:
• гарачы чай на месцы працы;
• комплекснае харчаванне для вадзіцеляў спецтэхнікі і ўборшчыкаў тэрыторый;
• дадатковыя цёплыя спецвопратка і абутак;
• дапамога ў набыцці неабходнага інвентару;
• заахвочванне працаўнікоў за добрасумленную працу.
  
  Акцыя шырока распаўсюдзілася ў арганізацыях і на прадпрыемствах Магілёва. У прафсаюзных пярвічках да яе падышлі асабліва душэўна. Напрыклад, старшыня пярвічнай арганізацыі КУП «ЖРЭУ Кастрычніцкага раёна г. Магілёва» Юлія Дубанос наведала аб’екты, на якіх шчыруюць працаўнікі прадпрыемства, і пачаставала людзей гарачымі піражкамі і чаем.
  Асабісты прыклад паказаў і старшыня пярвічнай арганізацыі Аўтобуснага парка № 1 Віктар Бараноўскі. Ён разам з камандай выехаў на гарадскія маршруты, каб падтрымаць вадзіцеляў і кандуктараў, якім даводзіцца забяспечваць камфортныя перасоўванні гараджан нават у няпростых умовах.
  
  На канцавых прыпынках, дзе ў супрацоўнікаў парка ёсць некалькі хвілін, каб адпачыць, прафсаюзны лідар частаваў калег цёплымі прысмакамі і выказваў словы ўдзячнасці і падтрымкі, галоўнымі з якіх стаў своеасаблівы дэвіз: «Наш прафсаюз — для вас, і мы заўсёды на вашым баку».
  Падрыхтавала Алёна Кухарава

У фокусе ўвагі прафсаюзаў узімку:
-цёплая экіпіроўка. Работнікі, што працуюць на адкрытым паветры, павінны быць забяспечаны якасным цёплым спецадзеннем і абуткам.
-цёплыя куткі. Абавязкова павінны быць абсталяваныя пакоі для адпачынку і прыёму гарачага харчавання.
-бяспечныя шляхі. Тэрыторыя, прыступкі, падыходы да тэрыторыі прадпрыемства павінны своечасова ачышчацца ад снегу і наледзі.
-дадатковыя перапынкі. Пры працы на холадзе па законе трэба забяспечваць спецыяльныя рэгламентаваныя перапынкі для абагравання.